Селекторот на шпанската кошаркарска репрезентација Скариоло го објави списокот со 18 кошаркари на кои ќе смета на претстојните Олимписки игри. На списокот се најде и ветеранот Пау Гасол.
Покана за настап добија осум играчи кои го освоија светското злато во 2019 година – Рики Рубио, Серхио Љуљ, Руди Фернандез, Виктор Клавер, Хуанчо Ернангомес, Вили Ернангомес, Марк Гасол и Пјер Ориола.
Во тимот се враќа Пау Гасол, кој најверојатно кариерата ќе ја заврши во Токио. Пау го сака единственото злато што му недостасува во неговата богата колекција.
Повратници се исто така Серхио Родригез и Алекс Абринес. За првпат на списокот на сениорската репрезентација се најдоа Усман Гаруба и Серхи Мартинез. Списокот ќе го комплетираат Алберто Абалде, Карлос Алосен, Дарио Брисуела, Себас Саис и Чаби Лопес-Аростеги.
Светските шампиони во Токио ќе ги одмерат силите со домаќинот Јапонија, Аргентина и победникот на квалификацискиот турнир во Каунас.
