Македонскиот вицепрвак Шкупи во првото квалификациско коло од Конференциската лига на УЕФА ќе ги одмери силите со косовскиот клуб Лапи. Првиот дуел се игра во Скопје на 8 јули, а реваншот е во Приштина.
Сепак, овие два тима веќе се во „битка“. Двата клуба се подготвуваат крај Охридското езеро. Вчера на пример не успеа „шпионската“ мисија на Шкупи. Лапи играше тест дуел со албанскиот првак Теута и победи со 1:0 на стадионот на „Караорман“ во Струга, со гол од пенал во 90. минута.
Косоварите платиле 400 евра за да нема публика, за да не се случи да дојдат „чаирчани“ и да ги скенираат нивните квалитети. Од Шкупи се појавиле на стадионот, но не им било дозволено да влезат внатре. Сепак, стадионот во Струга не е објект кој може целосно да се затвори, па така има многу места „дупки“, огради… од каде можеби нема идеални услови за гледање, но сепак може да се скенира.
За Лапи на дуелот со Теута настапил довчерашниот стопер на Работнички, Христијан Гроздановски. Тој се уште официјално не е дел од оваа екипа и не е во ростерот за дуелите со Шкупи.
фото: K.F. Llapi facebook
