Машката сениорска репрезентација на Македонија вечерва во СЦ „Јане Сандански“ ќе го одигра првиот (од двата предвидени) пријателски натпревари против селекцијата на Црна Гора.
Натпреварот кој ќе биде затворен за јавноста, стартува од 19.часот, и ќе биде првата можност за стручниот штаб, предводен од селекторот Драган Бајиќ, да ја провери моменталната форма на „црвено-жолтите“ пред почетокот на претквалификациските натпревари (12-18 август) против селекциите на Швајцарија и на Словачка.
Инаку, за овој натпревар, селекторот Бајиќ се реши да им даде шанса на вкупно 15. кошаркари. Своите минути во националниот дрес на овaа проверка ќе ја чекаат: Андреј Магдевски, Кристијан Николов, Бојан Крстевски, Адем Мекиќ, Бојан Трајковски, Бобан Стајиќ, Горјан Марковски, Дамјан Робев, Виктор Ефремовски, Марко Миловановиќ, Андреј Андоноски, Теодор Симиќ, Лејсон Зекири, Валмир Какруки и Џејкоб Вајли
За два дена, на 4. август, од 19.часот, двете селекции ќе одиграат уште еден контролен натпревар, исто така во СЦ „Јане Сандански“ во Скопје.
Во изменет состав ќе играат и црногорците во контролниот натпревар во СЦ „Јане Сандански“.
Предводникот од клупата, Борко Радовиќ донесе состав во кој ги нема можеби и двајата, во овој момент и најдобри црногорски кошаркари (ако не се земе во предвид Никола Вучевиќ), натурализираниот плејмејкер Џастин Кобс (Будуќност од Подгорица), како и еден од најдобрите крилни центри во европската кошарка, Бојан Дубљевиќ (Валенсија).
