Македонската кадетска репрезентација со пораз стартуваше на ЕХФ шампионатот кој се одржува во Скопје. Избраниците на Кирил Лазаров помалку неочекувано беа совладани од Грција и тоа со 26-30 (11-16).
Илиески со шест гола беше прв стрелец, зад него беа Ѓорговски и Митев со по четири погодоци.
Слабата игра во првото полувреме беше причина за поразот од нашиот јужен сосед.
Македонија се држеше 12. минути, по што противникот со серија од 3-0 поведе со 5-9. Лазаров не можеше да најде решение, ракометарите влегоа во серија на грешки, а реализацијата беше слаба. Ова беше повеќе од доволна причина за да Грција дојде и на плус шест (5-11, 7-13, 10-16), на одморот беше 11-16.
Во вториот дел, Македонија одигра многу подобро. Прво дојде на минус четири, по што Грција ја продолжи доминацијата, поведе и со 14-21. Нашите ракометари со серија од 3-0 се доближија на 19-23 во 46. минута, промашија напад за минус три, а потоа заработија исклучување.
Избраниците на Лазаров во 57. минута спуштија на 25-27, период во кој Грција имаше играч помалку, а Македонија промаши напад и направи нова техничка грешка. Лошата игра во првиот дел на крајот пресуди.
Утре е ден за одмор на шампионатот, но веќе во четврток, Лазаров и неговите момци ги чека уште потешка задача, играат против Полска, која пак убедливо ја совлада токму Грција.
