Еден од најдобрите фудбалери на македонската репрезентација Александар Трајковски ги кажа импресиите пред мечот со Ерменија и додаде дека ќе биде интересно под раководство на новиот селектор Боби Милевски. По Ерменија нашата најсилна селекција ќе игра со Исланд и со Романија во квалификациите за СП 2022.
„Ова е наш прв собир по ЕП и среќен сум што сум дел од оваа репрезентација и што го гледам тимот во кој има нови млади фудбалери кои се дојдени. Очекувам да продолжиме во ист континуитет, со максимална мотивација и да го дадеме максимумот како што го правевме тоа досега.
Сакам да продолжи добрата низа со резултати, имаме нов стручен штаб и според мене мислам дека сите се мотивирани да го одработат тоа што треба да се одработи.
Што се однесува до Ерменија, игравме неколку пати. Најважно е да бидеме фокусирани и да играме така како што сме играле досега и сме победувале. Со новиот селектор сигурно ќе има и нови идеи, ќе се обидеме да се наметнеме кај него и да го исполниме она кое го бара. Имаме краток период, важно е по секој меч добро да се одмориме затоа што пред нас се мечеви во кратко време. Тука сум веќе долго време, но се чувствувам уште млад и сакам уште долги години да придонесувам за националниот дрес“, изјави Трајковски.
