Фрајбург може да се смета за едно од најголемите изненадувања во досегашниот тек од сезоната во Бундеслигата. Тие одиграа нерешено со Арминија, и ги победија Борусија Дортмунд и Штутгарт, и со седум бодови се во горниот дел на табелата засега.
Фрајбург сега ќе има мотив повеќе за добри резултати, со оглед дека денеска управата информираше за новиот стадион кој е готов и кој може да биде пуштен во употреба официјално за два месеци, на мечот со Лајпциг.
Новиот стадион ќе го носи името „Еуропа Парк“ и се наоѓа веднаш до аеродромот. Неговата изградба чинеше 76 милиони евра, а е со капацитет од 35.000 гледачи.
Градењето почна во ноември 2018 година, и требаше да биде готов лани. Меѓутоа поради пандемијата, неговото отворање се одложи.
