Во недела со почеток од 16 часот на стадионот “Борис Трајковски“ во Скопје, ќе се одигра дербито на 3.коло во ВМФЛ – ЗАПАД меѓу Вардар и сегашниот лидер на табелата, квалитетниот состав на Воска Спорт. Клуб кој покажа со досегашната работа дека не се шегува и дека оди на највисок пласман сезонава.
Еден од најзаслужните за досегашните успеси на Воска Спорт, секако е тренерот Раде Цицмиловиќ, кој за Спортмедиа пред неделното дерби со Вардар истакна:
“Вардар и Силекс се главни фаворити за првите две места. Сепак сите знаат дека нашите амбиции се да бидеме во горниот дел на табелата и ако ни се укаже шанса за влез во ПМФЛ, секако дека ќе ја искористиме.Во недела играме со Вардар, сите знаеме кој е Вардар, нашиот најголем бренд, најтрофејниот наш клуб. Без разлика што сега игра во Втора лига, Вардар е Вардар“ вели Цицмиловиќ.
ВАРДАРЦИ ИМААТ ОДЛИЧЕН ТИМ
Тој нагласува дека и покрај се, неделниот ривал има одличен тим…
“Вардар има одличен тим и никогаш не смее да се потцени, без разлика на кое место се наоѓа на табелата. Ние во Скопје одиме да се надигруваме со Вардар и не криеме дека одиме на победа. Се освен три бода за нас ќе биде неуспех. Воска Спорт нема што да загуби на овој натпревар, а можеме многу да добиеме. Доколку победиме разликата меѓу Воска Спорт и Вардар ќе биде +8 бода за нас. И затоа со Вардар ќе играме во напаѓачка формација и на три бода“.
Стратегот на Воска Спорт не заборава да нагласи дека во неговиот тим владее одлична атмосфера…
“Ние го имаме најдобриот тим во лигата кој е целосно нов и кој е направен за кусо време. Направивме доста добри работи, имаме одлична атмосфера, победнички дух во екипата, потоа одлична хемија во тимот. Засега се оди како што треба, како што сите во клубот посакуваме, само така да продолжиме“посакува Цицмиловиќ.
ИЗАИР ЕМИНИ Е ВИСТИНСКИ ЛИДЕР
Шефот на струката на охридскиот тим потенцира дека е воодушевен од тоа како се однесува Изаир Емини.
“Јас ретко фалам играчи од мојот тим,но сега ќе направам исклучок. Посебно кога станува збор за Изаир Емини. Тој е вистински лидер и капитен на тимот. Одлично си ја врши својата работа, како на теренот така и надвор од него. Лидер кој би го посакал секој тренер во својот тим. Да кажам и тоа дека досега одигравме на високо ниво,се надевам дека така ќе биде и на дербито во недела со Вардар“ заврши Раде Цицмиловиќ.
