Српскиот напаѓач Душан Влаховиќ со два гола од пенал и донесе победа на Фиорентина со 2:1 на гостувањето кај Аталанта во меч од 3.коло во италијанската Серија А. На почетокот на мечот Џимсити постигна гол за Аталанта кој беше поништен со помош на ВАР поради офсајд. Потоа дојде погодокот на Влаховиќ од пенал откако противничкиот играч Јоаким Меле играше со рака во казнениот простор.
Во 47 минута нов пенал за Фиорентина. Џимсити направи прекршок во сопствениот шеснаесетник, а судијата покажа на 11 метри. Влаховиќ го совлада противничкиот голман.
Во 64. минута нов пенал, но сега за Аталанта. Судијата по консултација со колегите од ВАР собата покажа пенал за „сино-црните“ кој во гол го претвори Дуван Запата. До крајот резултатот не се смени.
Фиорентина победи во Бергамо за првпат по 2016 година. За нив ова е втора победа во првенството и имаат шест бода, додека Аталанта има четири бода и скор 1-1-1.
