Италија е поразена во полуфиналето на Лигата на нациите од Шпанија и тоа на „Сан Сиро“ во Милано со што остана без можност да освои втор трофеј по оној од ЕУРО и воедно стави крај на одличната серија од 37 меча без пораз. Селекторот Роберто Манчини зборуваше за резултатот и за натпреварот и додаде дека Италија ќе излезе посилна после ова. Пред полувремето Леонардо Бонучи доби црвен картон со што донекаде им ја олесни задачата на Шпанците.
„На вакви натпревари инциденти се случуваат. Првото полувреме лесно можеше да заврши 1:1. Очигледно, Шпанија добро ја држеше топката, меѓутоа разочарувачки е да загубиш вака со 10 фудбалери. Направивме грешка која не смее да се направи на вакви важни натпревари. Да бидам искрен не го видов фаулот за црвен картон, но тоа не е ни важно сега. Лео не смееше да си дозволи да биде санкциониран.
Иако бевме 10 на теренот, постигнавме гол и игравме добро. Можевме да пробаме со помлади фудбалери, меѓутоа и покрај поразот, задоволен сум од играта. И покрај резултатот кој не ни се допаѓа, играта ни дава надеж дека после ова ќе излеземе посилни“, кажа Манчини.
