Нема што, добро им оди на “гипсарите“ оваа есен. Ако во јуни се спасија во последните секунди од испаѓање во Втора лига, и тоа во баражот со Охрид, сега Ренова по 10.коло е втора со 21 бодови, само два помалку од лидерот Шкупи.
Десет мечеви, шест победи, три ремија и еден пораз, гол разлика 18:8. Ремзифаик Селмани блеска, со 8 голови е втор на листата на стрелците. Впрочем блеска цела екипа предводена од искусниот и одличен стратег Ќатип Османи.
Интересно, ова е вториот најдобар старт во една сезона на Ренова во клупската историја, ако се сметаат само првите десет кола во секоја сезона, и тоа од онаа 2005/06 кога “гипсарите“ за првпат почнаа да играат во нашата елитна лига.
Подобар биланс имаа само во сезоната 2009/10 година, тогаш под водство на Влатко Костов. Тогаш по првите десет кола имаа 23 бодови, а тогаш на крајот беа и шампиони.
Како што стојат засега работите, само Ренова со Ќато може да му ги “замрси“ сметките на Шкупи, фаворитот за титулата во оваа сезона.
И токму овие две екипи наредниот викенд, во меч од последното коло во првиот круг, на Чаир играат меѓусебе. Јасно е дека тоа ќе биде големо дерби во ПМФЛ.
