Луд меч на „Олд Трафорд“. Манчестер Јунајтед успеа да стигне до целиот плен на дуелот со Аталанта откако по првото полувреме имаше негатива од 0:2. Многу лошо одиграа момците на Солскјер во првиот дел, Мегваер деконцентриран, Роналдо нервозен, нападот без идеја, а средниот ред збунет. Тоа го искористија Италијанците кои постигнаа два гола, прво преку Пашалиќ потоа преку Демирел кој воедно го даде првиот свој гол во европските купови.
Но работата се смени во второто полувреме. Како сосема поинаква екипа на Манчестер да излезе на теренот. „Ѓаволите“ се разиграа, го принудија противникот да седи на својата половина и да греши. Бруно Фернандеш му асистираше на Рашфорд за намалување на резултатот, а потоа му асистираше на Мегваер за изедначувачкиот гол во 75. минута. Шест минути подоцна Кристијано Роналдо ја затресе мрежата на тимот од Бергамо и донесе значајна победа на составот од „Олд Трафорд“ во ЛШ.
Тоа воедно беше втора победа за Јунајтед со која скокна на чело на табелата во групата Ф со 6 бода, пред Аталанта која има 4 бода, Виљареал исто така 4 бода по триумфот над Јанг Бојс (2:1), а швајцарската екипа има само 3 бода.
Баерн ја запиша третата победа во третиот меч и е со една нога во осминафиналето. „Баварската машина“ со 4:0 ја совлада Бенфика со напомена дека два гола му беа поништени со ВАР. Лирој Сане со прекрасен слободен удар го отвори голот на Бенфика во 70. минута, а потоа од 80. до 85. минута Баерн зголеми на 4:0 (автогол на Евертон, голови на Левандовски и Сане).
Баерн е прв во групата Е со 9 бода и гол разлика 12:0, втора е Бенфика со 4 бода, Барса има 3, а Динамо Киев само 1 бод.
РЕЗУЛТАТИ
ГРУПА Е
БАРСЕЛОНА – ДИНАМО КИЕВ 1:0
БЕНФИКА – БАЕРН 0:4
ГРУПА Ф
МАНЧЕСТЕР Ј. – АТАЛАНТА 3:2
ЈАНГ БОЈС – ВИЉАРЕАЛ 1:4
ГРУПА Г
САЛЦБУРГ – ВОЛФЗБУРГ 3:1
ЛИЛ – СЕВИЉА 0:0
ГРУПА Х
ЧЕЛЗИ – МАЛМЕ 4:0
ЗЕНИТ – ЈУВЕНТУС 0:1
Leroy Sane goal for Bayern Munich against Benfica pic.twitter.com/yME6pEkuSG
— Live News For All (@LiveNewsForAll_) October 20, 2021
