По она вчерашно блескаво издание на Шкупи, кога лидерот со 5:0 ја декласираше Брегалница во дербито на 12.коло, денеска од 14 часот се играат сите останатити мечеви.
Работнички му гостува на Борец во Велес. Четата на Александар Влахо е во непријатна серија од пет меча без победа, тука го сметаме и куп дуелот со Пелистер. Последен пат “романтичарите“ победиле во Ѓорче и тоа на 19 септември, значи речиси еден месец и повеќе немаат триумф. И на тие пет меча имаат само еден постигнат гол. Токму затоа велиме дека на Работнички му “гори“. Во случај на неуспех, односно во случај тимот на Влахо да не победи денеска тогаш ќе си има проблеми, тогаш веројатно ќе мора да размислува за битка за опстанок во наредниот период.
Шкендија очекува лесни три бода против Тиквеш, но очекува, а дали ќе биде така останува да се види. Кавадарчани немаат намера предвреме да се предадат под Шара. Се знае кој е фаворит, но со Шкендија никогаш не се знае, цела есен игра „топло – ладно“. Во Тетово денеска се е можно…
„ПИРАТИТЕ“ ПО ТРЕТИОТ ТРИУМФ ВО СЕРИЈА…
За разлика од Работнички, на Скопје и тоа како му оди во последно време. На последните четири меча има три победи и само едно реми. Попладнево доаѓа на гости Ренова, екипа која се бори за највисок пласман, ете уште еден предизвик за момците на Љупчо Марковски – Калц. “Гипсарите“ пак сакаат да ги залечат “раните“ по двата порази едноподруго, од Шкендија во Купот и од Шкупи во минатото коло.
Во Струга доаѓа Академија Пандев, ова секако дека за наши услови ќе биде супер – дуел. Додека во Битола домашниот Пелистер против очајната Македонија ЃП оваа есен ќе се обиде да дојде до првата сезонска победа.
ДВОЈКИ ЗА 12.КОЛО – ДЕНЕСКА (14 Ч)
БОРЕЦ – РАБОТНИЧКИ
СТРУГА ТЛ – А.ПАНДЕВ
ШКЕНДИЈА – ТИКВЕШ
СКОПЈЕ – РЕНОВА
ПЕЛИСТЕР – МАКЕДОНИЈА ЃП
ВЧЕРА:
ШКУПИ – БРЕГАЛНИЦА 5:0
ТАБЕЛА
1.ШКУПИ 29*
2.РЕНОВА 21
3.А.ПАНДЕВ 21
4.БРЕГАЛНИЦА 19*
5.ШКЕНДИЈА 17
6.СТРУГА ТЛ 15
7.РАБОТНИЧКИ 15
8.СКОПЈЕ 15
9.МАКЕДОНИЈА ЃП 11
10.БОРЕЦ 8
11.ТИКВЕШ 6
12.ПЕЛИСТЕР 4
*Шкупи и Брегалница имаат натпревар повеќе
