Во Холандија повторно ќе се игра без публика откако владата донесе одлука за тринеделен локдаун. Тоа го објави премиерот Марк Руте во телевизиско обраќање, во кое додаде дека ова е повеќе од потребно во борбата со новата форма на коронавирусот и намалувањето на притисокот врз болниците.
Квалификацискиот меч меѓу Холандија и Норвешка кој е закажан за утре на „Де Кујп“ во Ротердам ќе се игра без публика. ФА на Холандија и на Ердивизијата објавија дека ги прифаќаат новите мерки донесени од Владата и кризниот штаб.
На прашањето што мисли за новите мерки, селекторот Луис ван Гал беше критичен.
„Фудбалската асоцијација, на барање на Владата, вложува многу пари во борбата со пандемијата и сега повторно ќе играме без навивачи. Разбирам дека короната е поважна од фудбалот во моментов, но не ја разбирам целосно одлуката“, изјави селекторот.
Во неделата во Холандија се регистрирани повеќе од 12.000 случаи на коронавирус и тоа беше причината за новите мерки. Во државата процентот на вакцинирање на возрасните е околу 85%.
