Свесни за тежината на гостувањето во Сегедин, ракометарите на Вардар, сепак, гледаат со оптимизам на дуелот в четврток од 7. коло во Лигата на шампионите. Искусното крило и еден од најдобрите ракометари на Вардар и оваа сезона, Тимур Дибиров, пред заминување вели:
„Мислам дека ќе биде еден тежок натпревар, но ние сакаме да дојдеме до победа. Ни недостасуваат бодови и навистина очекувам еден машки натпревар. Сигурно ќе биде тешко, но нема да се предадеме и одиме таму да победиме“, вели искусниот Тимур.
Репрезентативното крило, Георгиевски, вели дека Вардар не оди со бело знаме на ова гостување.
„Тежок и добро познат противник за нас. И минатата сезона одигравме два меча со нив, прилично тесни, но не победија. И оваа сезона ќе биде исто така тешко. Ние се подготвуваме, гледаме видео-анализи, имаа одличен меч со Веспрем, а покажаа дека играат одлична одбрана. Одиме таму да се надигруваме, без бело знаме, знаеме каков противник е, па мислам дека имаме шанси“, вели крилото Гоце Георгиевски.
