Македонскиот првак колку толку се рехабилитираше од поразот во Сегедин во Лигата на шампиони. Вардар 1961 на гостувањето кај Струга дојде до десетата победа во Супер-лигата и ја продолжи трката за Е.Пелистер за врвот на табелата.
Избраниците на Веселин Вујовиќ славеа со убедливи 28-37 и покрај тоа што на оваа средба дојдоа со половина сили. Во составот ги немаше Дибиров, Мишевски и Стоилов, како и Моралес, Тото…секако поради ограничувања на бројот на странски играчи.
Отвори Вардар со 2-6, држеше ритам против мотивираниот домаќин, кој во ниту еден момент не го загрози водството на фаворитот. По првото полувреме беше 15-18. Во продолжение „црвено-црните“ доминираа, стружани на двапати израмнија, откако гостите се опуштија, но потоа првакот „нагази“ за убедлива победа.
Валчак постигна седум гола, шест имаа Кевин Њокас и Талески, Барјактаревиќ кај Струга запиша девет гола.
