Екипата на Бадел 1862 вечерва (20 часот) на домашен терен го пречекува Партизан во историскиот меч оваа сезона во ВАБА лигата. Победа за македонскиот вицепрвак ќе значи пласман во Супер-лигата, прв голем успех во ова натпреварување.
Кошаркарките на Бадел ја добија првата битка со Партизан и тоа на гостински терен, па сега останува на домашен терен да ја повторат истата игра и да направат голем чекор.
„Исправени сме пред голем предизвик, победа на натпреварот со Партизан, и пласман во Супер лигата, со што би направиле историски исчекор на нашиот клуб и македонската кошарка. Но секако тоа ќе биде многу тешко, ако се земе предвид исцрпувачкиот ритам на натпревари, среда-сабота-среда, за неполни дваипол месеца имаме одиграно 20 натпревари, и долги патувања со поминати над 8000 километри, што секако придонесе за замор на кошаркарките и полесни повреди. Играме со млада, многу талентирана, и до крајни граници агресивна екипа, предводена од искусниот и квалитетен тренер Ивиќ, која на сите досегашни натпревари во лигата во поголемиот дел од натпреварите беше рамноправен противник, и поради неискуството ги губеше натпреварите најчесто во четвртата четвртина. Но убеден сум дека нашите девојки ќе го стават срцето на терен, и со една дисциплинирана и концентрирана игра ќе дојдеме до толку посакуваната победа. Нека победи подобрата и посреќна екипа“, изјави тренерот Перо Стамески.
Пренос од овој меч ќе има на МРТ.
