Новиот претседател на Меѓународната автомобилистичка федерација (ФИА), Мохамед Бен Сулејем, е уверен дека може да се справи со проблемите во Формула 1, но рече дека можеби ќе треба дури и да го казни седумкратниот светски шампион Луис Хамилтон. Причината е што британскиот возач не се појави на годишното доделување на наградите во Формула 1.
60-годишниот поранешен рели возач го замени Французинот Жан Тод на претседателското место на вчерашните избори во ФИА.
Тој најави дека целосно ќе се фокусира на проблемите на Формула 1. Сезоната заврши со спектакуларен скандал, а директорот на трките Мајкл Маси дојде до израз поради неговите одлуки за време на трката за Големата награда на Абу Даби.
Луис Хамилтон, кој ја загуби светската титула, не присуствуваше на церемонијата.
„Ако има некаков прекршок, не може да има прошка за тоа“, рече Бен Сулејем, но призна дека правилата можат секогаш да се подобруват и додаде дека сака нов почеток.
„Секогаш мора да се развиваме и да одиме напред. Ќе се обидеме да предвидиме секакви ситуации како оваа во иднина и да подготвиме решение“, изјави новиот претседател на ФИА.
