Само неколку дена откако ја освои Суперкуп титулата во Грција, некогашниот селектор на македонската одбојкарска репрезентација Јошко Миленкоски влезе во карантин. Тој и дури седум негови одбојкари биле позитивни на Ковид-19 тестовите по враќањето од Родос.
„Не сме влегле во сала откако се вративме од Родос. Очигледно закачивме Ковид-19 на бродот со кој се враќавме. И јас и седум одбојкари сме позитивни и влеговме во изолација. За среќа имаме само лесни симптоми и се надевам на скоро враќање во сала и на натпревари. Еден меч веќе го одложивме“, ни рече во разговор Миленкоски.
Неговиот тим Финикас направи вистинска сензација освојувајќи го Суперкупот на Грција за првпат во клупската историја.
