Македонија на претстојото ЕП веќе на 13 јануари се среќава со Словенија, потоа играме со Црна Гора два дена подоцна, за да на крај во групата не чека мечот со Данска. Нашите момци ги одработуваат последните подготовки во пресрет на ЕП, а за тоа што очекува од првенството свој коментар има Марко Мишевски.
„Во овие последните неколку тренинзи работиме на сите ситни детали на нашата игра. Ја консолидираме одбраната, а секако работевме и на нападот. Тактички и физички сме подготвени, ги анализиравме сите наши ривали и во овие неколку дена ќе ги одработиме максимално сите зададени задачи од селекторот. Подготвени сме за стартот на Европското првенство“, вели Мишевски.
Тој вели дека има силни и квалитетни противници, но вели исто така дека и ние си имаме свои адути…
„Што се однесува до ривалите во нашата група, имаме одиграно доста натпревари со Словенија. Ги познаваме добро, тоа е селекција која има квалитетни играчи, кои играат главна улога во своите клубови во Лигата на шампиони. Исклучително силна репрезентација, можеби тие се фаворити, но ние секако дека се надеваме на позитивен резултат, бидејќи имаме свои адути, а секако и квалитет. Црна Гора исто така е квалитетна екипа. Тој двојбој во 2.коло ќе биде важен и за двете екипи, секако дека нема да ги потцениме. Ние ќе играме максимално на сите три натпревари во групата па така ќе биде и на оваа средба. Данска е светски шампион и можеби фаворит и за европскиот трон. Ние ги изненадивме во Скопје во квалификациите за ова Европско првенство. Мораме да веруваме во себе и овој пат“ заклучи Марко Мишевски.
