Кошаркарите на Денвер славеа против шампионот Милвоки на гостински терен со убедливи 136:100, со уште една неверојатна партија на Никола Јокиќ, кој пропушти само еден скок за 13. трипл-дабл сезонава. Актуелниот МВП на НБА лигата постигна 18 поени, со 15. асистенции и девет скокови за само 28 минути на паркетот.
Во петтата последователна победа на Нагетс најефикасен беше Арон Гордон со 24 поени, а Монте Морис додаде 18.
Изненадување приредија кошаркарите на Орландо кои го победија Далас со 110:108 и така само по вторпат сезонава врзаа две победи. Чума Океке со 19 и Франц Вагнер со 18 поени беа носители на играта на домашните, додека на Далас не му помогна ниту седмиот трипл-дабл на Лука Дончиќ во сезоната, а 43-ти во кариерата. Тој натпреварот го заврши со 34 поени, 12 скока и 11 асистенции.
Најдобриот тим во лигата, Феникс успеа да ја надополни разликата од 12 поени во последната четвртина и на крајот да го победи Сан Антонио со 115:110. Феникс стана првиот тим во НБА лигата кој стигна до 40. победа, а најзаслужни за тоа беа Девин Букер и Михал Бриџис кои постигнаа 28, односно 26 поени.
НБА РЕЗУЛТАТИ:
Детроит – Кливленд – 115:105
Милвоки – Денвер – 100: 136
Орландо – Далас – 110: 108
Минесота – Јута – 126:106
Феникс – Сан Антонио – 115:110
Чикаго – Портланд – 130:116
Шарлот – ЛА Клиперс – 90:115
Атланта – ЛА Лејкерс – 129:121
