Лацио го објави првиот зимски трансфер, а станува збор за крилниот фудбалер на Спортинг Лисабон Жован Кабрал. „Небесно-сините“ беа пасивни на трансферниот пазар, меѓутоа од друга страна не можеа да се „расфрлаат“ со пари. Ги испратија Денис Вавро во Копенхаген и Ведат Муриќи во Мајорка, па римскиот клуб отвори простор да се засили барем со еден играч.
А изборот падна на Кабрал од Спортинг по формула позајмица до крајот на сезоната, а потоа опција за откуп за 7 милиони евра и тригодишен договор.
Инаку 23-годишниот Кабрал одигра 17 натпревари оваа сезона или вкупно 707 минути со ефект од три гола и една асистенција. Тој има еден настап за Зеленортските острови во 2017 година, но не продолжи да игра за оваа репрезентација затоа што аплицирал за португалски пасош и се надева дека ќе може да заигра за Португалија.
