Никола Берти, поранешен ас на Интер вели дека Милан нема шанси да ги совлада „нероаѕурите“ во миланското дерби што ќе се игра во сабота. Тој додада дека дури и Франк Кеси да го неутрализира Марсело Брозовиќ, се уште Интер е голем фаворит против градскиот ривал.
„Копјата ќе се кршат во средниот ред. Посилниот среден ред ќе го одлучи победникот. Во моментов, Милан нема шанси за победа. Играчите на Инѕаги од оваа линија делуваат како да играле заедно цел живот, ги имаат потребните интензитет и хармонија“, изјави Берти.
Хакан Чаланоглу ќе се соочи со поранешниот тим заедно со Брозовиќ и Барела во средниот ред, додека Милан на таа позиција ги има Бенасер, Тонали и Кеси.
„Инзаги нема од што да се плаши. Пиоли и да го неутрализира итриот Брозовиќ со тоа што ќе го стави „питбулот“ Кеси, тоа ќе отвори повеќе простор за Барела и Чаланоглу. Искрено, не гледам како Пиоли ќе го неутрализира средниот ред на Интер.
Очекувам блесок на Барела. Тој е феномен, тој е еден од оние играчи кои знае да ја запали публиката и никогаш не застанува.“, додава Берти кој со Интер ги освои Купот на УЕФА во 1991 и 1994 година, а беше италијански шампион во 1989.
