Сенегал и Египет вечерва (20 ч.) тргнуваат во битка за тронот на африканскиот континент. Сенегал, кој се смета за еден од фаворитите за трофејот, без пораз ја мина групата „Б“ и прими само еден гол, но победи само еднаш, со голот во додадено време на ѕвездата на Ливерпул, Садио Мане против Зимбабве, пред да ремизира со Гвинеја и Малави.
Во осминафиналето избраниците на Алиу Сисе не успеаја да одиграат убедливо, а отпорот на Зеленортските Острови го скршија дури кога тимот остана со деветмина на теренот. Во четвртфиналето и полуфиналето, Сенегал прикажа посилна и попродуктивна игра, стигнувајќи до две победи со 3:1 над Екваторијална Гвинеја и Буркина Фасо.
Од друга страна, „фараоните“ ја минаа групата Д како второпласирани, откако забележаа две победи над Гвинеја-Бисао и Судан со 1:0 и пораз од Нигерија со истиот резултат. Во осминафиналето седумкратните шампиони на Африка го елиминираа Брегот на Слоновата Коска, а потоа, со пресврт над Мароко во четвртфиналето со 2:1, стигна до полуфиналето каде повторно играше продолженија и пенали за да го скрши отпорот на домаќините, Камерун.
Сенегал никогаш не го освоил Африканскиот куп на нации, откако загуби во двете финалиња досега во 2002 година (од Камерун) и во 2019 година (од Алжир). Египет го држи рекордот со седум титули, а последен пат триумфираше во 2010 година кога ја победи Гана.
