Лудо финале во Лига купот на Англија на Вембли. Ливерпул го совлада Челзи на пенали и се закити со трофејот од Лига купот. Мечот заврши без голови, мрежите мируваа и по продолженијата по што се прејде кон изведување на пенали.
А таму вистински маратон. Двете екипи шутираа по 11 пенали (вкупно 22). Сите фудбалери шутнаа од белата точка и никој не погреши се до 11-тата серија. Голманот на Ливерпул Келехер погоди, а потоа Кепа промаши по што Ливерпул прослави победа со 11:10.
Интересно, Кепа влезе во игра во финишот за да брани пенали и не само што не фати ниту еден, туку го промаши и решавачкиот.
Претходно, во 67 минута на Ливерпул му беше поништен гол затоа што Матип бил во офсајд, а судијата поништи и гол на Лукаку за Челзи во првото продолжение од мечот.
За Ливерпул ова е рекорден деветти трофеј во Лига купот.
