Македонската кошаркарска репрезентација вечерва (20 часот) на домашен терен, во Арената „Борис Трајковски“ ја пречекува Грузија во реванш мечот од првата квалификациска фаза за место на Светското првенство 2023 година.
И за оваа средба ќе има промени во составот на „црвено-жолтите“. Македонија ќе биде посилна за Ненад Димитријевиќ и Андреј Магдевски, кои поради повреди не отпатуваа за Тбилиси, а во составот се приклучува Андреј Андоноски.
За пресметката со Грузија во Скопје отпаднаа Андреј Маслинко и Андреј Митревски, кој се повредија токму во Тбилиси. Во ростерот нема место за Павел Данаиловски, кој го имаше своето сениорско деби и ќе чека нова шанса во наредниот период.
На клупата на Македонија ќе го нема Драган Бајиќ, кој е позитивен на Ковид-19, па шанса одново ќе добие Александар Јончевски, кој вети подобра игра од првата средба и победа во овие квалификации.
По три одиграни меча, нашата репрезентација е единствена без победа во групата, беше празена од Шпанија дома, Украина и Грузија на гости.
