Преку ноќ се распадна еден од најмоќните тимови во Европа

Нападот на Русија врз Украина почна да менува многу работи во светот на спортот. Покрај тоа што се одложуваат бројни натпревари, почнаа да се распаѓаат и клубови од Русија.

Прв е гигантот ЦСКА Москва. На овој тим му се случи егзодус, по Грузиецот Торнике Шенгелија, бродот го напушти Германецот Јоханес Фојтман, како и Данецот Ифе Лундберг и Литванецот Мариус Григонис кои преку социјалните мрежи соопштија дека си одат.

„Постапките на играчите претставуваат прекршување на договорот и клупскиот правилник, но клубот има разбирање за ставот на секој од играчите. За нивниот статус ќе биде одлучено по политичката и спортската стабилизација во Европа“, велат од ЦСКА по најновата разврска.

Евролига за четврток го закажа дуелот меѓу ЦСКА и Реал кој ќе се одигра на неутрален терен, но со оглед на тоа дека сите аеродроми се затворени, патот на „домаќинот“ ќе биде вистинска одисеја, прашање е дали истиот ќе се одигра.