FOTO> Twitter/Eintracht Frankfurt
Од Ајнтрахт Франкфурт се задоволни од ждрепката во Лига Европа, а за противник во четвртфиналето ја добија Барселона. Тренерот на германскиот тим Оливер Гласнер изјави дека се способни да го елиминираат третопласираниот тим во шпанската Ла Лига – Барселона.
„Ова можеби звучи како провокација, но штом го елиминиравме петтопласираниот тим во шпанската Ла Лига (Бетис), способни сме да го елиминираме и третопласираниот (Барселона)“, вели Гласнер.
Ајнтрахт го елиминира Бетис со вкупен резултат 3:2. На првиот меч во Шпанија тимот од Франкфурт победи со 2:1, а на реваншот беше 1:1. Барса го елиминира Галатасарај благодарение на победата во Истанбул со 2:1 иако на „Ноу Камп“ беше 0:0.
„Екипата, клубот, градот сакаа атрактивен противник и го добија. Барселона дефинитивно е атрактивен противник. Важно е ние да не им се плашиме, зашто навистина сме способни да се пласираме во полуфинале“, додаде тренерот.
