Легендата на македонскиот фудбал, Дарко Панчев секако дека е важен во оваа ситуација да го оцени историскиот успех на Македонија во полуфиналниот бараж дуел против Италија, и пласманот во финалето и дуелот со Португалија.
Популарната „Кобра“ за српски „Курир“ даде кратко интервју во кое секако единствена тема беше дуелот во Палермо.
„Секако дека со сласт го следев дуелот во Палермо. Македонија одигра одличен меч. Тактични одлично, дисциплинирано, одговорно, без грешка. Италија како и секој фаворит, притискаше но не дојде до она што го посакуваше. Фудбалот не е спорт како ракомет или кошарка, каде што фаворитот во огромен број од случајите победува. Тука можеш да си фаворит колку сакаш, но ако не постигнеш гол, противникот многу лесно може да те казни. Тоа се покажа во случајов“ – вели Панчев па додава.
„Сите одиграа одлично, но ако мора да одвојам некого, тоа се дефанзивците кои перфектно одработеа. Димитриевски, Алиоски, Ристовски, Велковски, Муслиу… секако и стрелецот Трајковски. Одлично ја зафати топката при голот. Остро, презицно, во стилот токму на Кристијано Роналдо“ – вели „Кобра“ па поентира.
„Со оглед на фактот што токму Србија беше подобра од Португалија во квалификациите би му препорачал на нашиот селектор Милевски, веднаш да го побара Драган Стојковиќ Пикси кормиларот на Србија и да се консултира околу мечот во вторник. Сигурен сум дека има што да му каже“ – завршува Панчев.
