Возачот на Ред Бул Макс Верстапен победи на спектакуларната трка за Големата награда на Саудиска Арабија откако во последниот круг го претекна возачот на Ферари Шарлс Леклер.
Леклер беше лидер до самиот финиш на трката, а на крајот актуелниот шампион го претекна и стигна до првата победа во новата сезона. Леклер проба да возврати меѓутоа немаше среќа затоа што во првиот сектор, во кој Ферари е побрз од Ред Бул, се вееше жолто знаме, поради што беше јасно дека возачот на Ферари тешко ќе може да го нападне ривалот од Ред Бул.
Третото место го освои другиот возач на Ферари Карлос Сајнц кој зад водечкиот Верстапен заостана нешто повеќе од осум секунди. Четврти заврши Перез од Ред Бул, Расел од Мерцедес заврши на петтото место. Луис Хамилтон заврши дури на 10. место што е јасен показател колку лоша трка имаше Мерцедес во Саудиска Арабија.
