Македонија вечерва на “Драгао“ во Порто не успеа да испише историја, да се пласира на СП во Катар. Португалија со двата гола на Бруно Фернандеш славеше со 2:0 и сега таа, а не Македонија патува во Катар.
За тоа како го виде мечот од стручен агол свој коментар има Мирсад Јонуз.
“Како прво сите честитки за нашите момци за се она што што дојдоа до тука. Ова е голем успех за нив, за фудбалска Македонија. Сепак штета што не успеавме да го оствариме сонот. Мислам дека не бевме на нивото од мечот со Италија и тоа во сите сегменти. Португалија не не притисна како што се очекуваше, искусно и квалитетно сакаше да не фати на полуконтри. Ние не успевавме во нашата идеја да дојдеме до квалитетна игра, веројатно средниот ред можеби можеше повеќе“ потенцираше Јонуз.
И тој смета дека Португалија е сепак поквалитетна селекција од Италија, знаеше што сака.
„Па, така изгледа, и тоа се очекуваше. Ние не смеевме да си дозволиме да тргнеме со сите сили напред. И кога ќе го сторевме веднаш се отвараа коридорите кон нашиот гол. Секако дека жалиме што не се пласиравме на СП, но сакам да им кажам на момците – главите горе“ заврши Јонуз.
