Локалните весници од Валенсија повторно го актуелизираа можното заминување на нашиот репрезентативец Енис Барди од екипата на Леванте на крајот на сезоната. Според пишувањето на „Плаза Депортиво“, Барди полека го загуби статусот на ѕвезда во тимот и доколку клубот не успее да го сочува прволигашкиот статус голема е веројатноста управат да се реши на негова продажба за да покрие дел од финансиските загуби.
Барди во февруари потпиша нов договор со Леванте за уште две сезони, но тоа нема да биде пречка спортскиот директор на Леванте, Фелипе Мињамбрес да го стави на продажба. Според весникот, Мињамбрес подготвува неколку можни сценарија за наредната година, во која реална опција е и испаѓањето во Втората лига. Доколку тоа се случи, Леванте ќе сака да ослободи сума од 13 до 17 милиони евра која ќе ја загуби со неиграњето во Ла Лига.
Тоа, пак, ќе значи реална можност за продажба на Барди. Проценките се дека Леванте одлуката за иднината на Барди ќе ја донесе пред 30 јуни, кога најверојатно ќе постави цена од нешто повеќе од 10 милиони евра за неговата слобода.
