Утре од 17 часот се играат сите мечеви од 25.коло во двете втори лиги. Значи остануваат уште само три кола до крајот. Две дилеми се расчистени, а тоа е дека Силекс на западот ќе заврши како прв, му требаат уште два бода, може и помалку, за да стави печат на враќањето во елитата. Втората е дека Саса и дефинитивно веќе ги загуби шансите за пласман на првото или второто место на истокот.
Утре е ден за дербија. На програмата се мечевите Воска – Вардар, кој се игра во Струга, и во Прилеп се среќаваат Победа и Беласица, и тоа како ќе биде “жешко“ на двата натпревари.
Воска во последните три кола влегува со предност над Вардар од шест бода, па така утре со триумф, па и со реми, ќе стави печат на пласман во баражот, што ќе биде феноменален успех за тимот на Раде Цицмиловиќ. Но ако Вардар победи во Струга, е тогаш во последните две кола ќе биде пекол.
Инаку Воска до крајот игра дома со Вардар и Беса, а му гостува на Силекс во псоледното коло.
Вардар пак гостува кај Воска, игра дома со Силекс и на крај гостува кај Кораби.
ЗАПАД ТАБЕЛА
1.СИЛЕКС 62
2.ВОСКА 55
3.ВАРДАР 49
На истокот Слога (В) е во пол позиција, има бод предност пред втората Беласица и третата Победа. Виничани утре играат кај Саса, па потоа и гостуваат на Беласица за да на крај играат дома со Победа.
Беласица утре гостува во Прилеп, па дома се среќава со Слога (В) и на крај гостува кај Кожув.
Победа пак утре игра дома со Беласица, потоа пак игра дома со Кожув и во последното коло и гостува на Слога (В).
Значи овде имаме „мртва трка“ меѓу Слога (В), Беласица и Победа. Само една од овие три екипи ќе оди директно во ПМФЛ, втората ќе игра бараж а третата ќе биде малерот што се вели.
ИСТОК ТАБЕЛА
1.СЛОГА (В) 54
2.БЕЛАСИЦА 53
3.ПОБЕДА 53
