Жељко Бабиќ и Е.Пелистер спогодбено ја раскинаа соработката, информација која беше очекувана по двете загубени титули оваа сезона. Хрватскиот стратег во Битола дојде во 2022 година и покрај големите шанси да дојде до една од двете титули оваа сезона, не искористи ниту една. Па раководството на клубот ја искористи опцијата во договорот да ја прекине соработката по завршување на оваа сезона.
„РК Еурофарм Пелистер ја известува јавноста дека спогодбено со тренерот Жељко Бабиќ ја искористи опцијата во договорот за прекин на соработката на крајот на сезоната. По две и пол сезони нашиот клуб ќе добие нов тренер за сезоната 2022/23. Најискрено му се заблагодаруваме на Жељко Бабиќ за развојот на клубот во претходниот период од 2020 година до денес.
Без негова помош нашиот проект немаше да се развива по предвидениот колосек. Исто така изразуваме благодарност за остварените цели во европските натпреварувања и освоениот Суперкуп на Македонија 2022. Клубот му посакува многу успех во понатамошната работа и вратите на нашиот клуб секогаш ќе бидат отворени за професионалци како него“, се вели во известувањето на клубот.
Наскоро тимот од Битола ќе назначи и нов тренер.
