Голден Стејт по голем пресврт на домашен терен го совладаа Далас со 126-117 и дојдоа до водство од 2-0 во финалната серија на Западот.
Мавси беа одлични во првото полувреме, кошот на домашниот тим го изрешетаа со 15 тројки, имаа и предност од 19 поени, но не ја сочуваа. Вориорс припредија пресврт и на крајот заслужено се радуваа на втората победа.
Далас не го искористи и одличниот Лука Дончиќ, кој мечот го заврши со 42 поени, осум асистенции и пет скока. Кај победникот, Стеф Кари беше лидер со 32 поени, осум скока и пет асистенции, Пул имаше 23 поени.
Дрејмонд Грин мораше да седне на клупата на средината на третата четвртина поради петти фаул, а центарот Кевон Луни ја искористи можноста да постави рекорд во кариерата со 21 поен и 12 скока. Тој и беше јунакот од сенка на оваа средба.
