Македонската фудбалска репрезентација денеска ги започна подготовките за престојните настапи во новото издание на Лигата на нации на УЕФА. Селекторот Благоја Милевски вечерва го реализираше и првиот тренинг со репрезентативците кои во позитивна атмосфера се подготвуваат за следните предизвици.
Дефанзивецот Стефан Ашковски пред денешниот тренинг даде свои оценки за она што не очекува во следниот период.
„За 10 дена ќе имаме четири средби, ќе биде интересно. Бугарија е силна репрезентација, но ние сме подготвени и одиме на победа. Репрезентацијата е како едно семејство, па кој и да се појави на теренот ќе го даде својот максимум, затоа што ние сме Македонски и горди сме да играме за оваа земја. Со селекторот имаме систем на работа кој функционира долг период, така што секој кој е на теренот има свои задачи и знае што треба да одигра“, вели интернационалецот од романски Сепси.
