Екипата на РК Пролет ги продолжи договорите со двајца клучни играчи од изминатата сезона, Ласко Андоновски и Мартин Димов. Искусниот 30-годишен Андоновски кој игра на централната бековска позиција ја продолжи соработката со РК Пролет и со тоа остана верен на клубот и по цели десет години откако првпат потпиша со овој клуб во 2012 година.
„Чест ми е и задоволство што и после десет години соработка ќе продолжам да го носам дресот на Тинекс Пролет, клубот во кој ги доживеав најубавите моменти од мојата кариера. Очекувам навистина успешна следна сезона согласно и амбициите, името и реномето на овој клуб кои ги ужива во македонскиот ракомет“ – истакна Андоновски.
А десното крило Мартин Димов по одличната сезона доби продолжување на договорот за уште две години. Истовремено искусниот голман Јане Цветковски реши да ја заврши кариерата.
Инаку клубот досега потпиша и со репрезентативецот Томи Јагуриновски, а наскоро клубот ќе ги објави и новите засилувања.
