Повратникот во англиската Премиер лига Нотингем Форест не сака да одигра епизодна улога во новата сезона туку сака да биде фактор во најсилното англиско друштво. А така и треба со оглед на тоа дека се работи за култен англиски клуб и поранешен европски шампион.
„Шумарите“ се пофалија со шестиот нов фудбалер во своите редови. Десниот бек Неко Вилијамс дојде од редовите на Ливерпул. Клубот од „Сити граунд“ за овој 21-годишен велшки репрезентативец плати 20 милиони евра.
Вилијамс минатата полусезона играше за Фулам како позајмен, а за Велс има 21 настап од дебито во 2020 година.
Нотингем претходно ги донесе левиот бек Омар Ричардс од Баерн Минхен, голманот Дин Хендерсон, потоа плати по 10 милиони евра за десниот бек Жилиен Бјанконе од Троја и за централниот бек Муса Ниакате од Мајнц додека речиси 21 милион евра плати за напаѓачот Таиво Авонији од Унион Берлин.
