Италијанскиот тренер Филипо Инзаги стана тренер на италијанскиот второлигаш Реџина со која потпиша договор на три години. Ова ќе биде трет предизвик за Филипо и обид да избори промоција во Серија А со оглед дека во претходните години тоа го направи со Венеција и со Беневенто.
Реџина минатата сезона заврши две места над плеј-аут зоната, а сега со ангажманот на Инзаги се надева на висок пласман. Инзаги доаѓа на местото на Роберто Сталоне кој не го продолжи договорот.
Реџина ова лето остана без пет фудбалери, напуштија бековите Димитриос Ставропулос и Иван Лакичевиќ, голманот Томасо Аљети, играчот од средниот ред Николо Бјанки како и напаѓачот Герман Денис. Нови фудбалери се младите Лоренцо Гавиоли кој дојде од Интер и Јасин Ејаки од Вис Песаро.
