Американката Брук Андерсен го освои златото во фрлање кладиво во првата сесија на третиот натпреварувачки ден на Светското првенство во атлетика во Јуџин. 26-годишната Андерсен, која беше дури 10-та на ЛОИ во Токио во финалето успеа да префрли 78,96 метри и да ја остави зад себе главната конкурентка денеска, Канаѓанката Камрин Роџерс (75,52).
Бронзата остана во САД, откако Џени Касанавоид успеа да префрли 74,86 метри. Американската доминација е дел и од тоа што во Јуџин ја нема најуспешната во историјата во оваа дисциплина, светската рекордерка Анита Влодарчик од Полска, која победи во 2015 и 2017 година, а се повреди додека бркаше крадец на автомобил непосредно пред почетокот на СП.
