Нема никакви дилеми дека вечерва на “Максимир“ ќе се судрат Давид против Голијат што се вели. Не е тајна дека Динамо Загреб е голем, супер фаворит против Шкупи. Некој ќе рече дека во фудбалот се е можно, да, така е, но сепак во многу и парите одлучуваат.
А тие велат дека целиот играчки кадар на Динамо Загреб, според Трансфермаркт, вреди 100 милиони евра, додека тимот на нашиот шампион само 5,5 милиони евра.
Интересно, само капитенот на “модрите“ и наш репрезентативец Аријан Адеми вреди повеќе него целиот Шкупи. Имено според Трансфермаркт Лавот Адеми е со вредност од 6,5 милиони евра, а Шкупи 5,5 милиони.
Најскап играч на Динамо Загреб е Лука Иванушец со 12,5 милиони евра, додека највреден играч на Шкупи е Сандеј Адетунџи со 800.000 евра, исто толку според Трансфермаркт вреди и Фреди Алварез.
Да се надеваме дека сите овие податоци нема да играат којзнае каква улога и дека Шкупи сепак ќе има сила да извлече што подобар резултат.
