Тренерот на Динамо Загреб, противникот на Шкупи во второто коло од квалификациите за Лигата на Шампионите, влезе во отворен конфликт со медиумите во Хрватска. Тој очигледно има проблем со тоа да биде критикуван по ремито од првиот дуел со Шкупи, 2:2, за кое хратската јавност смета дека е рамно на катастрофа, и дека вината е исклучиво негова.
„Повторно гледам во медиумите се пишува за мене и се преокупирани со мене! Гледам како се пишува дека лутам, дека го изгубив компасот. Едно да ви кажам, медиумите навистина не ме интересираат, јас не живеам за нив ниту од нив. Освојував титули во трета, втора и прва лига, играв со Динамо во ЛШ, бев селектор на Хрватска, а не реков дека репрезентацијата играше најдобар фудбал тогаш. Јас сум телевизиски механичар? Јас сум горд на моето минато и на она што сум го сработил и како тренер но и како бизнисмен. Не трчав по секоја понуда за да пикнам некое евро во џебот. Јас не сум таков. Секако дека не сум најсреќен што одигравме реми против Шкупи, но има уште еден меч пред нас, оној во Скопје. За очекување е да помине поквалитетна екипа,а тоа сме ние. Да победевме написите ќе беа поинакви, но…примивме гол во последните моменти и сите удривте по мене, критики од сите страни. Не се пишува дека немам среќа можеби, туку дека немам појма како тренер и дека не знам што правам. Динамо нема медиуми кои му се наклонети, туку напротив тие се првите кој не туркаат надолу“ рече Чачиќ па се надоврза на ситуацијата во самиот тим.
„Што се однесува до Оршиќ самиот посака да не е во првиот тим против Шкупи. Играше против Локомотива, па не се чувствуваше доволно подготвен за другиот меч. Љубичиќ? Покажа дека сака да се стави во интерес на тимот. Ќе игра на таа позиција додека не бидам сигурен дека Бочкај може да одговори на барањата и на она што ми е потребно. Адеми сака да оди напред, има добро чувство, добар тајминг, доаѓа од втор план, постигнува голови и асистенции. Да, во моментов имаме само една вистинска „шестка“,а тоа е Мишиќ. Но, Адеми е подготвен и расположен да ја прифати и таа улога. Сепак, би можел да ви кажам дека би можеле да искористиме друг квалитетен играч на таа позиција. – заврши Чачиќ.
