Фудбалерите на Бенфика практично со првите 90 минути против дански Мидтјиланд си го обезбедија местото во плеј-офот од квалификациите за пласман во групната фаза во УЕФА Лигата на шампионите. Пред своите навивачи вечерва, Португалците го демолираа данскиот преставник со 4:1 и на реваншот треба само формално да си го потврдат мечот од плеј-офот каде ќе ги чека пресметка со подобриот од двомечот меѓу Динамо Киев и Штурм.
На преостанатите денешни дуели за издвојување е и изненадувачката победа на белгиски Унион Ст. Жилои против Г. Ренџерс од 2:0 со која Белгијците се чекор до плеј-офот.
Интересно ќе биде на реваншот меѓу Монако и ПСВ Ајндховен, откако вечерва Монако се спаси од пораз во последните 10-тина минути од мечот, кој на крајот заврши нерешено – 1:1. Претходно Шериф Т. Загуби дома од Викторија Плзен со 2:1, а со истиот резултат и Динамо (З) на гости го совлада Лудогорец.
