Уште едно понижувачко фудбалско попладне за навивачите на Манчестер Ј. „црвените ѓаволи“ на Ерик Тен Хаг доживеаја вистински дебакл и во 2. коло од новата премиерлигашка сезона, откако на гостувањето кај Брентфорд беа поразени со убедливи 4:0.
Домашните за 35 минути ја наполнија мрежата на гостите, кои одиграа прво полувреме за заборав. „Пчелите“ со головите на Дасилва (10’), Јенсен (18’), Ми (30’) и Мбуемо (35’) станаа само третиот тим во историјата кој успеал да му даде четири гола на Манчестер Ј. во едно полувреме, откако тоа досега го имаат направено само уште Ливерпул и Тотенхем.
Гостите не успеаја да го ублажат поразот во вториот дел, иако Тен Хаг се обиде со неколку замени да ги врати своите фудбалери во живот. Играта на „црвените ѓаволи“, како и односот на фудбалерите на терените ни оддалеку не потсетуваат на тим кој може за брзо време да се врати во врвот на наглискиот фудбал. Брентфорд, пак, уште еднаш потврди дека е тим кој ќе им прави големи проблеми и на најдобрите во лигата.
