Македонската кошаркарска репрезентација денеска (19 часот) против Данска на гости ги отвара претквалификациите за место на Европското првенство 2025 година.
Андреј Јакимовски е еден од оние од кои се очекува да бидат идните носители на играта на нашиот сениорски состав. Младиот крилен играч очекува позитивен почеток на овие претквалификациски натпревари, со голема верба гледа кон предизвикот кој стори пред Македонија.
„Очекуваме позитивен резултат на стартот. Имавме доста време да се спремаме, максимално го искористивме периодот за пријателски мечеви и тренинзи и во Данска одиме по победа. Имаме нов селектор, со Александар Јончевски, со кого одлично соработуваме и сите играчи се задоволни. Очекуваме подобра игра, доста побрза игра, таков стил повеќе ѝ одговара на оваа репрезентација. Ние мора да го дадеме максимумот на теренот, само така може да дојдеме до позитивен резултат веќе на овој натпревар“, изјави Јакимовски пред мечот.
Три дена после овој дуел, Македонија е домаќин на Словачка, меч кој се игра во салата „Кале“, која ФИБА ја одобри за одигрување на претквалификациските мечеви.
