Македонскиот шампион Шкупи во моментов го игра реванш дуелот од плеј офот за пласман во групната фаза од Лигата на Конференции против тимот на Балкани во Приштина. Откако првиот меч заврши 1:2 за косовците, вечерва Шкупи има задача да обезбеди победа за да избори историски пласман.
Засега има проблеми да го стори тоа затоа што игра со десетмина играчи од втората минута. Катастрофална грешка на Абдула кој лошо реагира на една топка која ја минува последната одбранбена линија го исфрла Рахмани. Овој излегува сам пред Наумовски, а Абдула го повлекува за дрес и нормално како последен играч автоматски добива црвен картон и исклучување.
Следуваше ерупција од воодушевување на стадионот Фадиљ Вокри, каде што навивачите на Балкани веќе почнаа да слават групна фаза. Следуваше слободен удар крај голот на Наумовски. А потоа и сериозна неколуминутна иницијатива во која Куч имаше идеална шанса но шутираше покрај голот.
Наумовски спаси зицер
Во 40. Минута, домаќинот ја имаше најсериозната шанса до тој момент. Красниќи доби идеална топка по левата крилна позиција, влезе во шеснаесетникот шутираше, но Наумовски идеално излезе, скрати агол и прекрасно интервенираше по ударот на напаѓачот на Балкани. Чуварот на мрежата на Шкупи дефинитивно е најзаслужниот што Шкупи сеуште има шанса за подвиг во Приштина и што сеуште има 0:0.
