Репрезентацијата на Србија ја впиша и третата победа во групата Д на Евробаскетот. Вечерва во Прага нашиот северен сосед ја демолира Финска со 100:70 и е на врвот на табелата со максимални шест бода по три кола.
Уште по првата четвртина Србите демонстрираа сила и ја најавија победата. Финска добро отвори во еден момент имаше и предност од 10:15, но набргу потоа потона. Србите направија пресврт поведоа со 33:22, а на крајот на првото полувреме резултатот го зголемија на 62:34.
Кај Србите шест кошаркари имаа двоцифрен број на поени. Недовиќ и Мициќ постигнаа по 14 поени, Јокиќ и Калиниќ по 13, Лучиќ 12, а Гудуриќ 11. Кај Финците најефикасен беше Лаури Марканен со 18 поени.
Во групата Ц играа Италија и Украина. Украина успеа да победи со 84:73. Италијанците водеа во поголем дел од мечот, но во последната четвртина се влезе изедначено 57:57, а таму Украинците имаа одлична серија од 13:2 со што го „поплочија“ патот кон третата победа во групата.
За Украина најефикасен беше Сватослав Михалиук со 25 поени, а кај Италија 17 поени постигна Полонара.
Италија го впиша вториот пораз по неуспехот против Грција пред неколку дена.
