Македонската фудбалска федерација на својата официјална страница им се заблагодари на сите кои дојдоа вечера на Националната Арена „Тодор Проески“ да ги поддржат играчите на дуелот против Бугарија жалејќи то оваа средба не заврши со позитивен резултат.
„Драги наши навивачи,
Од срце упатуваме голема благодарност до сите вас кои дојдовте од сите краеви на Македонија да им дадете поддршка на македонските репрезентативци на Националната арена „Тодор Проески“ на натпреварот против Бугарија.
Беше навистина импресивно да се види како и на дожд, повеќе од 20 илјади луѓе, безусловно ја сакаат и бодрат Македонија.
Од првата до последната минута.
На сите ни е жал што репрезентацијата и покрај големиот напор не успеа на крајот да оствари позитивен резултат, но длабоко сме убедени дека ќе бидеме на највисоко ниво на следните натпревари и одново ќе имаме причина за славје пред полни трибини на Националната арена“, се вели во известувањето на ФФМ.
