Прво, па гостување во Штип, кај Брегалница. Милан Илиевски, новиот стратег на Работнички, своето деби како шеф на стручниот штаб на еден од нашите најголеми и најтрофејни клубови, ќе го има денеска и тоа под Исарот.
Тој и неговиот прв асистент, Баже Илијоски, двајцата легенди на клубот од Градски парк, добија шанса да се покажат и како тренери. Знаеме што му донесоа на клубот како играчи, но сега е време за тренерскиот занает.
Натпреварот во Штип се игра денеска од 15 часот, секако дека на Работнички нема да му биде лесно. И штипјани сезонава не ја започнаа според посакувањата, па и тие ќе имаат свои мотиви да дојдат до бодовите.
Од друга страна Работнички низ историјата знаел и тоа како дoбро да одигра во Штип, па и убедливо да победи. На последното гостување Работнички славел со 0:3, претходно и со 1:2. Вкупно на последните три мечеви со Брегалница, тимот на Работнички има три победи. На последните пет средби има дури четири победи. Па така во некоја рака Брегалница му е вистински “пациент“ на тимот од Градски парк.
