Новата сезона на домашната одбојкарска сцена започна во средата со првиот меч од женската Прва лига, за викендов да стартува и новата сезона кај мажите. Денеска треба да се одиграат сите пет планирани натпревари од премиерното коло во новиот одбојкарски шампионат во машка конкуренција, каде годинава немаме промена во системот на натпреварување, но има промена во учесниците во натпреварувањето.
По долги години, Скопје останува без гигантите во елитната машка конкуренција. По Работнички, годинава од натпреварувањето се откажа и Вардар по сериозните финансиски проблеми кои ги имаше изминатите сезони. Во елитата го нема и тимот на Дибра Волеј, додека екипата на Јанта Волеј годинава ќе настапува под името ОК Либеро. Нови имиња во елитата се Петровец и Сушево.
Во првото коло дербито ќе биде во Тетово меѓу градските ривали Универзитет во Тетово и Лирија, додека шампионот Струмица е слободен.
