Јувентус остана без можност за пласман во нокаут фазата од Лигата на шампионите откако вечерва се спаси од вистински дебакл на гостувањето кај Бенфика во Лисабон. Домашните водеа со високи 4:1 се до 77. минута кога најпрво Милик, а потоа и Меккени во 79. минута успеаја да намалат на 4:3 и да го внесат мечот во неизвесен финиш. Домашните уште во првото полувреме зачекорија кон убедлива победа (3:1), а во вториот дел со вториот гол на Рафа Силва само го потврдија триумфот. Јувентус со овој пораз остана без шанси за пласман во следната фаза.
ПСЖ во вториот меч од оваа група ја наполни мрежата на Макаби Хаифа обезбедувајќи триумф од 7:2. Одлична пратија имаше триото Меси, Нејмар, Мбапе, каде Меси и Мбапе погодија по двапати, а Нејмар постигна еден гол.
Динамо (З) не успеа да најде решение за разиграниот Милан кој замина од „Максимир“ со висока победа од 4:0. Адеми, Ристовски и нивните соиграчи се држеа 40-тина минути, по што дојде голот на Габиа за водство на Милан, а во вториот дел погодија и Рафаел Леао, Жиру (пенал), а автогол си даде Љубичиќ.
Ослабениот Реал (М) дојде како вистински подарок за РБ Лајпциг. „Биковите“ на домашен терен славеа со 3:2 и успеаја да дојдат на чекор до пласманот во нокаут фазата. Гвардиол и Нкунку погодија за домашните во првиот дел, додека Тимо Вернер погоди за 3:1. За Реал, Винисиус Жуниор погоди на крајот на првото, а Родриго од пенал на крајот на второто полувреме.
Без голови заврши мечот во Дортмунд меѓу Борусија и Манчестер Сити, а нерешено беше и во Глазгов на дуелот меѓу Селтик и Шахтјор (1:1).
Група Е
18.45 РБ Салцбург – Челзи 1:2
21.00 Динамо Загреб – Милан 0:4
Група Ф
21.00 Селтик – Шахтјор Д. 1:1
21.00 РБ Лајпциг – Реал Мадрид 3:2
Група Г
18.45 Севиља – ФК Копенхаген 3:0
21.00 Борусија Д. – Манчестер Сити 0:0
Група Х
21.00 Бенфика – Јувентус 4:3
21.00 ПСЖ – Макаби Хаифа 7:2
